柬埔寨社会福利部严惩遗弃儿童行为 呼吁寻求援助

ក្រសួងសង្គមកិច្ច ចាត់ទុកការបោះបង់ទារក ឬកុមារ នៅតាមមន្ទីរពេទ្យ ឬទីសាធារណៈ ជាអំពើអមនុស្សធម៌ ឃោរឃៅ និងព្រៃផ្សៃ ដែលផ្ទុយនឹងច្បាប់ សេចក្តីថ្លៃថ្នូរ វប្បធម៌ ក្រមសីលធម៌ គោលនយោបាយកិច្ចការពារកុមារ អនុសញ្ញា ស្តីពីសិទ្ធិកុមារ និងលិខិតូបករណ៍អន្តរជាតិដទៃទៀត។ ទន្ទឹមគ្នានេះ ក្រសួងសង្គមកិច្ច ពិនិត្យឃើញថា អំពើល្មើសនេះ គឺមានចែងនៅក្នុងក្រមព្រហ្មទណ្ឌនៃព្រះរាជាណាចក្រកម្ពុជាឆ្នាំ២០០៩ ដែលឪពុកម្តាយ ឬអ្នកអាណាព្យាបាល ត្រូវទទួលខុសត្រូវចំពោះមុខច្បាប់។ ក្នុងករណីមានការលំបាក ឬមានបញ្ហាណាមួយក្នុងការចញ្ចឹមបីបាច់ថែទាំទារក ឬកុមារ ក្រសួងសូមលើកទឹកចិត្តដល់ឪពុកម្តាយ ឬអ្នកអាណាព្យាបាល ត្រូវទំនាក់ទំនងជាមួយអាជ្ញាធរមានសមត្ថកិច្ចក្នុងមូលដ្ឋានរបស់ខ្លួន ដើម្បីទទួលបានការគាំទ្រសេវាសង្គមសមស្របដែលផ្តល់ដោយក្រសួង ស្ថាប័ន និងអង្គភាពរបស់រាជរដ្ឋាភិបាល ព្រមទាំងអង្គការមិនមែនរដ្ឋាភិបាលជាដៃគូ ជៀសវាងការមិនអើពើ ឬការបោះបង់ពួកគេ។