卫生部与FHI 360深化合作 推进艾滋病防治数字化转型

ជំនួបពិភាក្សាការងារជាមួយថ្នាក់ដឹកនាំអង្គការ FHI 360 ដើម្បីពង្រឹងកិច្ចសហប្រតិបត្តិការលើការឆ្លើយតបមេរោគអេដស៍នៅកម្ពុជា —— ប្រទេសប្រេស៊ីល៖ ឆ្លៀតក្នុងឱកាសចូលរួមសន្និសីទអន្តរជាតិ AIDS 2026 នាព្រឹកថ្ងៃទី២៧ ខែកក្កដា ឆ្នាំ២០២៦ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល បានទទួលជួបពិភាក្សាការងារជាមួយថ្នាក់ដឹកនាំអង្គការ FHI 360 ដើម្បីពិភាក្សា អំពីទិសដៅនៃការអនុវត្តកម្មវិធី និងការពង្រឹងភាពចីរភាពនៃការឆ្លើយតបមេរោគអេដស៍នៅកម្ពុជា។ ក្នុងជំនួបនេះ ភាគីទាំងពីរបានពិភាក្សាលើអាទិភាពសំខាន់ៗ រួមមាន ការធានានិរន្តរភាពនៃសេវាបង្ការ ការធ្វើតេស្ត ការព្យាបាល ការតាមដានបរិមាណមេរោគ (Viral Load Monitoring) និងសេវាកម្មផ្អែកលើសហគមន៍។ ជាមួយគ្នានេះ ក៏បានពិភាក្សាអំពីការពង្រីកការប្រើប្រាស់ថ្នាំបង្ការមុនការប៉ះពាល់មេរោគអេដស៍ (PrEP) ការធ្វើតេស្តរកមេរោគអេដស៍ដោយខ្លួនឯង (HIV Self-Testing) ការពង្រឹងការបន្តទទួលការព្យាបាលរបស់អ្នកផ្ទុកមេរោគអេដស៍ ការលើកកម្ពស់គុណភាពទិន្នន័យ និងការអភិវឌ្ឍប្រព័ន្ធសុខាភិបាលឌីជីថល ជាពិសេសប្រព័ន្ធ HIV Master Patient Index។ លោកជំទាវរដ្ឋលេខាធិការ បានថ្លែងអំណរគុណចំពោះអង្គការ FHI 360 ដែលបាននិងបន្តគាំទ្រក្រសួងសុខាភិបាល និងមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ (NCHADS) ក្នុងការអនុវត្តកម្មវិធីប្រយុទ្ធនឹងមេរោគអេដស៍នៅកម្ពុជា។ លោកជំទាវរដ្ឋលេខាធិការ បានគូសបញ្ជាក់ពីសារៈសំខាន់នៃការសម្របសម្រួលយ៉ាងជិតស្និទ្ធរវាងក្រសួងសុខាភិបាល NCHADS អង្គការ FHI 360 ដៃគូរដ្ឋាភិបាលសហរដ្ឋអាមេរិក និងអង្គការពាក់ព័ន្ធ និងសហគមន៍អ្នកជំងឺ ដើម្បីធានាការផ្លាស់ប្តូរប្រកបដោយរលូន និងនិរន្តរភាព ស្របតាមគោលដៅបញ្ចប់ជំងឺអេដស៍ជាបញ្ហាសុខភាពសាធារណៈនៅឆ្នាំ២០៣០។ ជំនួបនេះបានឆ្លុះបញ្ចាំងពីការប្តេជ្ញាចិត្តរួមរវាងក្រសួងសុខាភិបាល និងអង្គការ FHI 360 ក្នុងការពង្រឹងភាពជាដៃគូ ការរក្សានិរន្តរភាពនៃសេវាសុខាភិបាល និងការបន្តការវិនិយោគលើប្រព័ន្ធសុខាភិបាល ដើម្បីរក្សាសមិទ្ធផលដែលកម្ពុជាសម្រេចបានក្នុងការឆ្លើយតបនឹងមេរោគអេដស៍។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)