旅游部绿色旅游骑行活动明日开赛 800人骑行金边至达山

ត្រៀមខ្លួនហើយឬនៅ? តស់មកដឹងពីតម្រាយផ្លូវ នៃព្រឹត្តិការណ៍ជិះកង់ដើម្បីទេសចរណ៍បៃតងភ្នំដា និងការសិក្សា ដែលនឹងប្រព្រឹត្តទៅក្រោមអធិបតីភាពឯកឧត្តម ហួត ហាក់ រដ្ឋមន្ដ្រីក្រសួងទេសចរណ៍ និងមានការចូលរួមពីកីឡាករ-កីឡាការិនីជាតិ និងអន្ដរជាតិប្រមាណជិត ៨០០នាក់ នាព្រឹកថ្ងៃទី១៦ ខែសីហា ឆ្នាំ២០២៦ ស្អែកនេះ។ ក្បួនកង់ នឹងចេញដំណើរពីវិមានឯករាជ្យ (រាជធានីភ្នំពេញ) ឆ្ពោះទៅក្រុងតាខ្មៅ(ខេត្តកណ្ដាល) ដោយធ្វើដំណើរបន្ដតាមផ្លូវចាក់អង្រែឆ្ពោះទៅកាន់ផ្លូវជាតិលេខ ២១ ឆ្ពោះទៅស្រុកកោះធំ រហូតដល់ចំណុចស្ពានទី ៤៥ ត្រូវបត់ស្តាំចូលទៅកាន់សាលាស្រុកព្រៃកប្បាស នៃខេត្តតាកែវ (ឈប់សម្រាក ទទួលទានអាហារសម្រន់ និងភេសជ្ជៈ) មុនបន្ដដំណើរទៅស្រុកអង្គរបូរី និងគោលដៅចុងក្រោយ គឺប្រាសាទភ្នំដា ដោយនឹងមានកម្មវិធីអមមួយចំនួនផងដែរ៕