柬埔寨电信监管局预警

សូមប្រុងប្រយ័ត្ន! និយ័តករទូរគមនាគមន៍កម្ពុជា បានឱ្យដឹងថា នាពេលថ្មីៗនេះ សង្កេតឃើញថា មានបុគ្គលមួយចំនួន បានធ្វើការផ្សព្វផ្សាយ និងផ្តល់សេវាដែលអះអាងថា ជា "សេវាការពារគណនី” ឬ"សេវាការពារទំព័រ" នៅលើបណ្តាញទំនាក់ទំនងសង្គម ជាថ្នូរនឹងការបង់ប្រាក់កម្រៃ ដោយលើកឡើងថា ខ្លួនអាចជួយការពារ ឬធានាមិនឱ្យគណនី ឬទំព័ររបស់អ្នកប្រើប្រាសត្រូវបានបិទ ផ្អាក លុប ឬបាត់បង់។ ជាញឹកញ៉ាប់ បុគ្គលទាំងនោះ ថែមទាំងអះអាងថា ខ្លួនមានទំនាក់ទំនងផ្ទាល់ជាមួយក្រុមហ៊ុនម្ចាស់ថ្នាល់ ឬមានឧបករណ៍បច្ចេកទេសពិសេស ដើម្បីបង្កើនភាពគួរឱ្យជឿជាក់។ និយ័តករទូរគមនាគមន៍កម្ពុជា សូមធ្វើការបញ្ជាក់ថា ការអះអាងថាអាចធានាការពារគណនី ឬទំព័រ ជាថ្នូរនឹងប្រាក់កម្រៃ គឺជាការ ផ្សព្វផ្សាយព័ត៌មានមិនពិត ដែលអាចមានធាតុផ្សំនៃបទល្មើសបោកប្រាស់ និងអាចត្រូវទទួលខុសត្រូវចំពោះមុខច្បាប់ ជាធរមាន។ ការផ្សព្វផ្សាយបែបនេះ ជាទូទៅមានគោលបំណងបង្កការភ័យខ្លាច ដើម្បីទាក់ទាញអ្នកប្រើប្រាស់ឱ្យ បង់ប្រាក់ ឬផ្តល់ព័ត៌មានសម្ងាត់ ដូចជា លេខទូរស័ព្ទ អាសយដ្ឋានអ៊ីមែល ពាក្យសម្ងាត់ លេខកូដ OTP ឬសិទ្ធិគ្រប់គ្រងទំព័រ ដែលអាចនាំឱ្យមានផលវិបាកធ្ងន់ធ្ងរ។