文化艺术部启动公务员生物识别普查登记

លោកជំទាវបណ្ឌិតសភាចារ្យ ភឿង សកុណា អញ្ជើញធ្វើជីវមាត្រជាគំរូ ក្នុងយុទ្ធនាការជំរឿនមន្ត្រីជាក់ស្តែងនៅក្រសួងវប្បធម៌ និងវិចិត្រសិល្បៈ ព្រឹកថ្ងៃទី១៩ ខែសីហា ឆ្នាំ២០២៦ នេះ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញធ្វើជីវមាត្ររួចរាល់ ដើម្បីជាគំរូដល់ថ្នាក់ដឹកនាំ មន្ត្រីរាជការ និងមន្ត្រីជាប់កិច្ចសន្យាទាំងអស់ ក្នុងឱកាសដែលក្រុមការងារនៃគណៈកម្មការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងនៃក្រសួងមុខងារសាធារណៈ បានចាប់ផ្តើមយុទ្ធនាការជំរឿនមន្ត្រីជាក់ស្តែង និងការធ្វើជីវមាត្រជាផ្លូវការ នៅក្នុងក្របខ័ណ្ឌក្រសួងវប្បធម៌ និងវិចិត្រសិល្បៈ។ យុទ្ធនាការជំរឿនមន្ត្រីជាក់ស្តែងនៅតាមរចនាសម្ព័ន្ធអង្គភាពចំណុះទីស្តីការក្រសួងវប្បធម៌ និងវិចិត្រសិល្បៈនេះ ប្រព្រឹត្តទៅក្នុងរយៈពេល ២ថ្ងៃពេញ ចាប់ពីថ្ងៃទី១៩ ដល់ថ្ងៃទី២០ ខែសីហា ឆ្នាំ២០២៦។ ការចុះអនុវត្តផ្ទាល់នាពេលនេះ គឺជាក្រសួងគោលដៅទី២២ នៃយុទ្ធនាការជំរឿនមន្ត្រីថ្នាក់ជាតិ ក្នុងគោលបំណងផ្ទៀងផ្ទាត់វត្តមានជាក់ស្តែង និងប្រមូលទិន្នន័យជីវមាត្រ ដើម្បីធានាបាននូវទិន្នន័យមន្ត្រីរាជការមួយដែលមានភាពច្បាស់លាស់ ឯកភាព និងមានតម្លាភាពខ្ពស់ក្នុងការគ្រប់គ្រងធនធានមនុស្ស។ ដើម្បីឱ្យដំណើរការជំរឿនរយៈពេល ២ថ្ងៃនេះ ប្រព្រឹត្តទៅបានឆាប់រហ័ស និងទាន់ពេលវេលា គណៈកម្មការជំរឿនសូមអំពាវនាវដល់ថ្នាក់ដឹកនាំ មន្ត្រីរាជការ និងមន្ត្រីជាប់កិច្ចសន្យាទាំងអស់គ្រប់អង្គភាពចំណុះទីស្តីការក្រសួង មេត្តាអញ្ជើញមកបង្ហាញខ្លួនឱ្យបានត្រឹមត្រូវតាមកាលវិភាគ និងទីតាំងដែលក្រុមការងារបានកំណត់ ដោយភ្ជាប់មកជាមួយនូវអត្តសញ្ញាណប័ណ្ណសញ្ជាតិខ្មែរ (ច្បាប់ដើម) ឬកាតមន្ត្រីរាជការ (ច្បាប់ដើម) ដើម្បីឱ្យក្រុមការងារបច្ចេកទេសធ្វើការថតរូប និងធ្វើជីវមាត្រឱ្យបានគ្រប់ៗគ្នា៕