实居省乌栋棉芷市威蓬分区 27个村党小组正式成立

នាព្រឹកថ្ងៃអាទិត្យ ១កើត ខែជេស្ឋ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី១៧ ខែឧសភា ឆ្នាំ២០២៦ ឯកឧត្តម លី ច័ន្ទតុលា សមាជិកគណៈកម្មាធិការកណ្តាល អនុប្រធានទី១ក្រុមការងារគណបក្សចុះជួយក្រុងឧដុង្គម៉ែជ័យ និងជាប្រធានក្រុមការងារគណបក្សចុះជួយសង្កាត់វាលពង់ និងលោកជំទាវ ឈីវ ភិរម្យ បានដឹកនាំក្រុមការងារប្រារព្ធពិធីប្រកាសទទួលស្គាល់សមាសភាពក្រុមការងារគណបក្សចុះជួយមូលដ្ឋានភូមិទាំង២៧នៃសង្កាត់វាលពង់ ដែលប្រព្រឹត្តទៅក្នុងស្នាក់ការគណបក្សសង្កាត់វាលពង់ ក្រុងឧដុង្គម៉ែជ័យ ខេត្តកំពង់ស្ពឺ ក្រោមអធិបតីភាព ឯកឧត្តម លី សុន សមាជិកគណៈកម្មាធិការកណ្តាល អនុប្រធានក្រុមការងារគណបក្សចុះជួយខេត្តកំពង់ស្ពឺ និងជាប្រធានក្រុមការងារគណបក្សចុះជួយក្រុងឧដុង្គម៉ែជ័យ។ ក្នុងកម្មវិធីនេះមានការអញ្ជើញចូលរួមពីសំណាក់ លោក សុខ សយ ប្រធានគណៈកម្មាធិការគណបក្សក្រុងឧដុង្គម៉ែជ័យ លោក ម៉ា រស់ ប្រធានគណៈកម្មាធិការគណបក្សសង្កាត់វាលពង់ អនុប្រធាន សមាជិកគណៈកម្មាធិការគណបក្សសង្កាត់វាលពង់ ព្រមទាំងសមាសភាពក្រុមការងារគណបក្សចុះជួយមូលដ្ឋានភូមិទាំង២៧នៃសង្កាត់វាលពង់ សរុប២៧៧នាក់។ ឯកឧត្តម លី ច័ន្ទតុលា បានថ្លែងទៅកាន់អង្គពិធីទាំងមូលអំពីតួនាទី និងភារកិច្ចរបស់ក្រុមការងារគណបក្សចុះជួយមូលដ្ឋានភូមិ ដែលដើរតួនាទីយ៉ាងសំខាន់ក្នុងការធ្វើសកម្មភាពការងារគណបក្សដោយផ្ទាល់នៅមូលដ្ឋានភូមិនីមួយៗ ព្រមទាំងរៀបចំផែនការសកម្មភាព ហើយនឹងអនុវត្តផែនការនោះប្រកបដោយប្រសិទ្ធភាពខ្ពស់ ដើម្បីឈានទៅសម្រេចឱ្យបាននូវការប្ដេជ្ញាចិត្តជាយុទ្ធសាស្រ្ត ស្របតាមជំនួយស្មារតីស្ដីពីការត្រៀមលក្ខណៈឆ្ពោះទៅកាន់ការបោះឆ្នោតនៅឆ្នាំ២០២៧ និងឆ្នាំ២០២៨ ក្នុងក្របខណ្ឌនៃខេត្តកំពង់ស្ពឺ។ ក្នុងពីធីទាំងមូលបានប្រារព្ធឡើងប្រកបដោយភាពរីករាយ និងស្នាមញញឹម ដោយមានការរៀបចំជារៀបអាហារសម្រន់ និងភេសជ្ជៈជូនអ្នកចូលរួមទាំងអស់ អ្វីដែលពិសេសនោះក៏មានការរៀបចំអាហារសាមគ្គីនាពេលថ្ងៃត្រង់ក្រោយបញ្ចប់កម្មវិធីផងដែរ។