文化艺术部完成公务员普查 成为第22个完成单位

ក្រសួងវប្បធម៌ និងវិចិត្រសិល្បៈ ជាក្រសួងទី២២ ដែលបានបញ្ចប់ការធ្វើជំរឿនមន្ត្រីជាក់ស្តែងជាស្ថាពរ គណៈកម្មការជំរឿនមន្ត្រីជាក់ស្តែង បានប្រកាសថា ដំណើរការចុះធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែង នៅតាមរចនាសម្ព័ន្ធរបស់អង្គភាពចំណុះទីស្តីការក្រសួងវប្បធម៌ និងវិចិត្រសិល្បៈ ត្រូវបានបញ្ចប់រួចរាល់ជាស្ថាពរ ប្រកបដោយលទ្ធផលគូសបញ្ជាក់ជាវិជ្ជមាន។ យុទ្ធនាការនេះ បានប្រព្រឹត្តទៅក្នុងរយៈពេល ២ថ្ងៃ ចាប់ពីថ្ងៃទី១៩ ដល់ថ្ងៃទី២០ ខែសីហា ឆ្នាំ២០២៦ នៅអាគារនៃទីស្តីការក្រសួងវប្បធម៌ និងវិចិត្រសិល្បៈ។ តាមរយៈការចុះអនុវត្តផ្ទាល់នេះ ក្រសួងវប្បធម៌ និងវិចិត្រសិល្បៈ បានក្លាយជាក្រសួងទី២២ ដែលបានបញ្ចប់កិច្ចការងារជំរឿនមន្ត្រីជាក់ស្តែង។ ក្នុងដំណើរការរយៈពេល ២ថ្ងៃនេះ មានថ្នាក់ដឹកនាំ និងមន្ត្រីរាជការគ្រប់ជាន់ថ្នាក់ទាំងអស់របស់ក្រសួង សរុបប្រមាណ ១,៦០០នាក់ បានអញ្ជើញមកចូលរួមបង្ហាញមុខ និងធ្វើជីវមាត្រ ព្រមទាំងសហការចូលរួមបំពេញភារកិច្ចស្របតាមបែបបទ ព្រមទាំងនីតិវិធីណែនាំរបស់គណៈកម្មការជំរឿន ធ្វើឱ្យកិច្ចដំណើរការទាំងមូលប្រព្រឹត្តទៅយ៉ាងរលូនតាមការគ្រោងទុក។ គណៈកម្មការជំរឿនមន្ត្រីជាក់ស្តែង សូមសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះស្មារតីទទួលខុសត្រូវ និងការចូលរួមយ៉ាងពេញទំហឹងពីសំណាក់ថ្នាក់ដឹកនាំ ព្រមទាំងមន្ត្រីគ្រប់លំដាប់ថ្នាក់ទាំងអស់នៃក្រសួងវប្បធម៌ និងវិចិត្រសិល្បៈ ដែលបានញ៉ាំងឱ្យយុទ្ធនាការនេះ សម្រេចបានជោគជ័យយ៉ាងត្រចះត្រចង់៕