柬埔寨教育部发布关于国王赴华接受手术治疗的公告

ទូលព្រះបង្គំយើងខ្ញុំទាំងអស់គ្នាជាថ្នាក់ដឹកនាំ មន្ត្រីរាជការ លោកគ្រូ អ្នកគ្រូ កីឡាករ កីឡាការិនី និស្សិត និងសិស្សានុសិស្សទាំងអស់នៃក្រសួងអប់រំ យុវជន និងកីឡា សូមសម្តែងនូវក្តីបារម្ភ ក្រោយពីទទួលព័ត៌មានថា ព្រះរោគមហារីក ក្រពេញប្រូស្តាត (prostate cancer) របស់ ព្រះករុណាជាអម្ចាស់ជីវិតលើត្បូងជាទីគោរពសក្ការៈដ៏ខ្ពង់ខ្ពស់បំផុត តម្រូវឱ្យ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ទទួលការព្យាបាលដោយការវះកាត់តាមវេជ្ជបញ្ជា នៅមន្ទីរពេទ្យនារដ្ឋធានីប៉េកាំងនៃសាធារណរដ្ឋប្រជាមានិតចិន និងបន្តគង់ប្រថាប់នៅទីនោះមួយរយៈពេល ដើម្បីតាមដាន ត្រួតពិនិត្យ និងព្យាបាលព្រះរោគ ចាប់ពីថ្ងៃទី១៨ ខែមេសា ឆ្នាំ២០២៦នេះ។ ទូលព្រះបង្គំយើងខ្ញុំទាំងអស់គ្នា សូមព្រះបរមរាជានុញ្ញាតឧទ្ទិសបួងសួងដល់គុណបុណ្យព្រះរតនត្រ័យកែវទាំងបី វត្ថុស័ក្តិសិទ្ធិទាំងឡាយក្នុងលោក ទេវតាថែរក្សាព្រះមហាស្វេតច្ឆត្រ និងបុណ្យបារមីនៃព្រះវិញ្ញាណក្ខន្ធអតីតព្រះមហាក្សត្រ ព្រះមហាក្សត្រិយានីខ្មែរគ្រប់ព្រះអង្គ ព្រះបារមីនៃព្រះបរមរតនកោដ្ឋ ព្រមទាំងទេវតាឆ្នាំថ្មី សូមជួយបីបាច់ថែរក្សា អភិបាលគ្រងរក្សា និងប្រសិទ្ធពរជ័យថ្វាយ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គទទួលការព្យាបាលព្រះរោគ ដោយវះកាត់បានដោយជោគជ័យ និងជាសះស្បើយ១០០ភាគរយ ព្រមទាំងទទួលបាននូវព្រះរាជសុខភាពល្អ ព្រះកាយពលមាំមួនដូចដើមវិញ ដើម្បីព្រះអង្គបន្តគង់ប្រថាប់ជាម្លប់ដ៏ត្រជាក់ត្រជំដល់ប្រជានុសាស្រ្តជាកូនចៅ ចៅទួត របស់ព្រះអង្គជានិច្ចនិរន្តរ៍តរៀងទៅ។ សូម ព្រះករុណាព្រះបាទសម្តេចព្រះបរមនាថ នរោត្តម  សីហមុនីព្រះមហាក្សត្រនៃព្រះរាជាណាចក្រកម្ពុជា** **ជាទីសក្ការៈដ៏ខ្ពង់ខ្ពស់បំផុត ទ្រង់ព្រះមេត្តាទទួលនូវគារវកិច្ចប្រកបដោយស្វាមីភក្តិដ៏ខ្ពង់ខ្ពស់បំផុតអំពីទូលព្រះបង្គំយើងខ្ញុំទាំងអស់គ្នា៕ 🔍[គេហទំព័រ និងបណ្ដាញសង្គមផ្លូវការក្រសួង](https://linktr.ee/moeyscambodia)🔵 [ ](https://oer.moeys.gov.kh/)🌐[Facebook](https://facebook.com/moeys.gov.kh)    👨‍🏫[Podcast](https://podcasters.spotify.com/pod/show/moeys) 🌐[YouTube](https://www.youtube.com/moeyscambodia)     🌐[Instagram ](https://www.instagram.com/moeyscambodia)🌐[TikTok](https://bit.ly/tiktokmoeyscambodia)        🌐[Telegram](https://t.me/moeysnews)  🏫 [Sala MIL](https://link.moeys.gov.kh/SALA-MIL)   🤖[MILChatbot](http://t.me/MILSelfLearningBot)