柬埔寨协调东盟观察团核实边境争议 推动朱凯村划界进程

កម្ពុជា សម្របសម្រួលអាស៊ានចុះពិនិត្យតំបន់ភូមិជោគជ័យ និងជំរុញវាស់វែងព្រំដែនឆាប់បំផុត លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានឲ្យដឹងថា នៅព្រឹកថ្ងៃទី១៧ ខែឧសភា ឆ្នាំ២០២៦ វេលាម៉ោង ១១:០០នាទី ក្រុមអ្នកសម្របសម្រួល (CLG) កម្ពុជា បានសម្របសម្រួលជូនក្រុមអ្នកសង្កេត ការណ៍អាស៊ាន (AOT) ចុះសង្កេត ការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែន នៅតំបន់ភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ តំបន់ខាងលើត្រូវបានរាយការណ៍ថា បានទទួលរងការវាយប្រហារ ការរាយបន្លាលួស និងការដាក់ពង្រាយទូកុងតឺន័រ ដោយយោធាថៃក្នុងលក្ខណៈខុសច្បាប់ ដែលបណ្ដាលឱ្យប្រជាពលរដ្ឋកម្ពុជាជាច្រើនគ្រួសារ មិនទាន់អាចវិលត្រឡប់ទៅលំនៅដ្ឋានវិញបាន។ ក្រុមសង្កេតការណ៍ក៏បានពិនិត្យលើការ គោរព និងអនុវត្តវិធានការនានា ស្រប តាមសេចក្តីប្រកាសរួមក្រោយបទឈប់បាញ់ផងដែរ។ ការចុះសង្កេតការណ៍នេះ បង្ហាញពីភាពចាំបាច់ក្នុងការចាប់ផ្តើមដំណើរការវាស់វែង និងខណ្ឌសីមាព្រំដែនឡើងវិញ ដោយគណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ ឱ្យបានឆាប់បំផុត ដើម្បីអនុញ្ញាតឱ្យប្រជាពល រដ្ឋអាចវិលត្រឡប់ទៅលំនៅដ្ឋានវិញដោយសុវត្ថិភាព និងគ្មានការរារាំង។ រាជរដ្ឋាភិបាល និងក្រសួងការពារជាតិកម្ពុជា បន្តបញ្ជាក់ពីការប្តេជ្ញាចិត្តយ៉ាងម៉ឺងម៉ាត់ ក្នុងការគោរព និងអនុវត្តយ៉ាងពេញលេញនូវសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) និងកិច្ចព្រមព្រៀងសន្តិភាពពាក់ព័ន្ធផ្សេងៗ ដើម្បីស្តារឡើងវិញនូវប្រក្រតីភាព សន្តិភាព និងស្ថិរភាពយូរអង្វែងតាមបណ្តោយព្រំដែន៕