马德望敦德里水坝项目加速 副首相率团实地勘察

ឯកឧត្តមឧបនាយករដ្ឋមន្ត្រី កើត រិទ្ធ ដឹកនាំគណៈប្រតិភូចុះពិនិត្យគម្រោងអភិវឌ្ឍន៍ទំនប់ដូនទ្រី ក្នុងខេត្តបាត់ដំបង ==================== ខេត្តបាត់ដំបង៖ នារសៀលថ្ងៃសុក្រ ទី៣០ ខែតុលា ឆ្នាំ២០២៦ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង បានដឹកនាំគណៈប្រតិភូចុះពិនិត្យគម្រោងអភិវឌ្ឍន៍ទំនប់ដូនទ្រី ស្ថិតក្នុងភូមិសាស្ត្រស្រុករុក្ខគិរី ខេត្តបាត់ដំបង។ អញ្ជើញចូលរួមក្នុងដំណើរចុះពិនិត្យនេះ រួមមាន ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម, ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ, ឯកឧត្តម សុខ លូ អភិបាលនៃគណៈអភិបាលខេត្តបាត់ដំបង ព្រមទាំងថ្នាក់ដឹកនាំខេត្ត អាជ្ញាធរមូលដ្ឋាន និងសមាជិក សមាជិកានៃក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបងមួយចំនួនទៀត។ ការចុះពិនិត្យនេះ មានគោលបំណងស្វែងយល់អំពីស្ថានភាពជាក់ស្តែង សមត្ថភាពស្តុក និងគ្រប់គ្រងទឹក ព្រមទាំងសក្តានុពលនៃការប្រើប្រាស់ទំនប់ដូនទ្រី ដើម្បីបម្រើដល់ការស្រោចស្រព ការផ្គត់ផ្គង់ទឹក និងការកាត់បន្ថយហានិភ័យនៃគ្រោះទឹកជំនន់នៅតំបន់ផ្នែកខាងក្រោម។ ទន្ទឹមនេះ ដំណើរចុះពិនិត្យក៏ជាឱកាសសម្រាប់ថ្នាក់ដឹកនាំ និងស្ថាប័នពាក់ព័ន្ធពិភាក្សា និងសម្របសម្រួលការងារ សំដៅធានាឱ្យការគ្រប់គ្រង និងការប្រើប្រាស់ធនធានទឹកពីទំនប់នេះទទួលបានប្រសិទ្ធភាព និងប្រយោជន៍ជាអតិបរមា។ ទំនប់ដូនទ្រី គឺជាហេដ្ឋារចនាសម្ព័ន្ធធារាសាស្ត្រយុទ្ធសាស្ត្រដ៏សំខាន់មួយ ដែលមានសមត្ថភាពស្តុកទឹកប្រមាណ ១៦៣ លានម៉ែត្រគូប និងអាចផ្គត់ផ្គង់ទឹកស្រោចស្រពលើផ្ទៃដីកសិកម្មប្រមាណ ៣៣ ០០០ ហិកតានៅរដូវវស្សា និងប្រមាណ ៤ ៥០០ ហិកតានៅរដូវប្រាំង។ ទំនប់នេះផ្តល់អត្ថប្រយោជន៍ដល់ប្រជាកសិករក្នុងស្រុករុក្ខគិរី និងស្រុកមោងឫស្សី ខេត្តបាត់ដំបង ព្រមទាំងស្រុកបាកាន ខេត្តពោធិ៍សាត់។ គម្រោងនេះ មិនត្រឹមតែរួមចំណែកធានាសន្តិសុខទឹក និងបង្កើនផលិតភាពកសិកម្មប៉ុណ្ណោះទេ ប៉ុន្តែថែមទាំងជួយលើកកម្ពស់ជីវភាពរស់នៅរបស់ប្រជាពលរដ្ឋ កាត់បន្ថយផលប៉ះពាល់ពីគ្រោះធម្មជាតិ និងជំរុញការអភិវឌ្ឍសេដ្ឋកិច្ចមូលដ្ឋានប្រកបដោយចីរភាពផងដែរ៕