金边菩森芷区一制衣厂倒闭 30余名工人被欠薪

**កម្មកររោងចក្រជាង៣០នាក់រងទុក្ខ ថៅកែរត់ចោល មិនបើកប្រាក់ឈ្នួលជាង១ខែ ស្នើអាជ្ញាធរជួយដោះស្រាយ** **ភ្នំពេញ៖ កម្មករ-កម្មការិនីជាង៣០នាក់ ដែលបម្រើការងារនៅរោងចក្រ «គួរឆាយ» ស្ថិតនៅភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ កំពុងជួបការលំបាកយ៉ាងខ្លាំង បន្ទាប់ពីអះអាងថា ថៅកែបានចាកចេញដោយមិនទាន់បើកប្រាក់ឈ្នួលជូនពួកគាត់អស់រយៈពេលជាង១ខែ។** **តាមការឱ្យដឹងពីក្រុមកម្មករ ប្រាក់ឈ្នួលដែលពួកគាត់ទទួលបានមានចាប់ពីប្រមាណ ៦០ម៉ឺនរៀល ដល់៨០ម៉ឺនរៀលក្នុងម្នាក់។ ការមិនទទួលបានប្រាក់ឈ្នួលនេះ បានធ្វើឱ្យពួកគាត់ជួបការលំបាកក្នុងការរស់នៅ ក៏ដូចជាការចំណាយលើម្ហូបអាហារ និងបន្ទុកជីវភាពប្រចាំថ្ងៃ។** **កម្មករបានស្នើសុំឱ្យអាជ្ញាធរ និងស្ថាប័នពាក់ព័ន្ធ ជាពិសេសមន្ទីរការងារ ជួយអន្តរាគមន៍ ដើម្បីស្វែងរកដំណោះស្រាយ និងទាមទារប្រាក់ឈ្នួលដែលពួកគាត់មិនទាន់ទទួលបាន។** **ជុំវិញករណីនេះនៅព្រឹកថ្ងៃទី២៦ ខែសីហា ឆ្នាំ២០២៦ អ្នកសារព័ត៌មានបានរាយការណ៍ជូន លោកអភិបាលខណ្ឌពោធិ៍សែនជ័យ ដើម្បីស្នើឱ្យជួយអន្តរាគមន៍។ លោកអភិបាលខណ្ឌបានបញ្ជាក់ថា នឹងចាត់ចែងឱ្យមន្ត្រីពាក់ព័ន្ធ និងខាង មន្ទីរការងារ ចុះពិនិត្យ និងសម្របសម្រួលដោះស្រាយបញ្ហាជូនក្រុមកម្មករ។** **សូមបញ្ជាក់ថា តាមការអះអាងរបស់កម្មករ ថៅកែដែលពួកគាត់លើកឡើងឈ្មោះ ចាង ស៊ីអ៊ីង អាយុ៥៦ឆ្នាំ។ ករណីនេះ ក្រុមកម្មករកំពុងរង់ចាំការអន្តរាគមន៍ពីអាជ្ញាធរ និងមន្ទីរជំនាញ ដើម្បីឱ្យពួកគាត់អាចទទួលបានប្រាក់ឈ្នួលដែលនៅសល់។**