柬埔寨司法部为25名新任外交官开展政治与司法培训

ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការនៃក្រសួងយុត្តិធម៌ បានអញ្ជើញចូលរួមធ្វើបទឧទ្ទេសនាមជូនមន្រ្តីការទូតជាន់ខ្ពស់ជាឯកអគ្គរាជទូត អគ្គទីប្រឹក្សា អគ្គកុងស៊ុល និងទីប្រឹក្សា ដែលទើបទទួលបានការតែងតាំងថ្មី សរុប ២៥រូប អំពី “សភាពការណ៍នយោបាយ ស្ថានភាពសិទ្ធិមនុស្ស ប្រព័ន្ធយុត្តិធម៌ និងការអនុវត្តច្បាប់នៅកម្ពុជា” =================== នាព្រឹកថ្ងៃព្រហស្បតិ៍ ១០រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៩ ខែកក្កដា ឆ្នាំ២០២៦ ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការនៃក្រសួងយុត្តិធម៌ បានអញ្ជើញចូលរួមធ្វើបទឧទ្ទេសនាមក្នុងវគ្គពង្រឹងសមត្ថភាពមន្រ្តីការទូតជាន់ខ្ពស់ សម្រាប់ឯកអគ្គរាជទូត អគ្គទីប្រឹក្សា អគ្គកុងស៊ុល និងទីប្រឹក្សា ដែលទើបទទួលបានការតែងតាំង ថ្មីសរុប ២៥រូប អំពី “សភាពការណ៍នយោបាយ ស្ថានភាពសិទ្ធិមនុស្ស ប្រព័ន្ធយុត្តិធម៌ និងការអនុវត្តច្បាប់នៅកម្ពុជា” នៅវិទ្យាស្ថានជាតិកាទូត និងទំនាក់ទំនងអន្តរជាតិ នៃក្រសួងការបរទេស និងសហប្រតិបត្តិការអន្តរជាតិ មុននឹងចេញទៅបំពេញបេសកកម្មការទូតនៅក្រៅប្រទេសក្នុងពេលឆាប់ៗខាងមុខនេះ។ ក្នុងវគ្គបណ្តុះបណ្តាលនេះ ឯកឧត្តម បានចែករំលែកបទពិសោធន៍ និងធ្វើបទបង្ហាញទៅលើក្របខ័ណ្ឌគោលនយោបាយសម្រាប់ការកែទម្រង់ប្រព័ន្ធយុត្តិធម៌ ក្នុងនីតិកាលទី៧, ការកែទម្រង់ប្រព័ន្ធតុលាការ, ការលើកកម្ពស់យន្តការដោះស្រាយវិវាទក្រៅប្រព័ន្ធតុលាការ, ព្រមទាំង សភាពការណ៍នយោបាយ ស្ថានភាពសិទ្ធិមនុស្ស និងការអនុវត្តច្បាប់នៅកម្ពុជាផងដែរ។ វគ្គបណ្តុះបណ្តាលសម្រាប់មន្រ្តីការទូតជាន់ខ្ពស់នេះរៀបចំឡើង ក្នុងគោលបំណងពង្រីកចំណេះដឹង និងបង្កើនប្រសិទ្ធភាពបំពេញការងាររបស់មន្រ្តីការទូតកម្ពុជាឱ្យកាន់តែសកម្ម ស៊ីជម្រៅ និងមានប្រសិទ្ធភាព ក្នុងការការពារផលប្រយោជន៍ និងកិត្យានុភាពកម្ពុជាលើឆាកអន្តរជាតិ។