洪玛奈质问反对派 泰媒称66户失138公顷地

សម្តេចធិបតី ហ៊ុន ម៉ាណែត ចោទសួរក្រុមអ្នកនយោបាយខ្មែរនៅក្រៅប្រទេស ហេតុអ្វីស្ងាត់ស្ងៀមចំពោះព័ត៌មានថៃថា ពលរដ្ឋខ្លួន ៦៦គ្រួសារ បាត់បង់ឱកាសធ្វើចម្ការលើដី ១៣៨ហិកតា? សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចោទជាសំណួរទៅកាន់ក្រុមអ្នកនយោបាយខ្មែរមួយចំនួននៅក្រៅប្រទេស ដែលតែងតែចោទប្រកាន់រាជរដ្ឋាភិបាលថា ធ្វើឱ្យបាត់បង់ទឹកដីនៅតាមបណ្តោយព្រំដែនកម្ពុជា-ថៃ ដោយគ្មានភស្តុតាង ឬឯកសារច្បាស់លាស់ ប៉ុន្តែបែរជារក្សាភាពស្ងៀមស្ងាត់ នៅពេលប្រព័ន្ធផ្សព្វផ្សាយថៃរាយការណ៍ថា ពលរដ្ឋថៃចំនួន ៦៦គ្រួសារ មិនអាចបន្តធ្វើចម្ការលើផ្ទៃដីប្រមាណ ១៣៨ហិកតា ដែលធ្លាប់ចូលមកប្រើប្រាស់នៅខាងកម្ពុជាបានទៀត។ តាមរយៈសំណេរបង្ហោះលើបណ្តាញសង្គម សម្តេចធិបតី ហ៊ុន ម៉ាណែត បានលើកឡើងថា កន្លងមក ក្រុមអ្នកនយោបាយខ្មែរនៅក្រៅប្រទេសមួយក្រុម តែងតែយកព័ត៌មានពីប្រព័ន្ធផ្សព្វផ្សាយថៃ មកចោទប្រកាន់រាជរដ្ឋាភិបាលកម្ពុជា ពាក់ព័ន្ធនឹងការបោះបង្គោលព្រំដែនបណ្តោះអាសន្ន និងការសាងសង់របងបេតុងជាឯកតោភាគីរបស់ថៃ នៅចន្លោះបង្គោលព្រំដែនលេខ៥២ ដល់លេខ៥៩។ ទោះជាយ៉ាងណា សម្តេចធិបតីបានកត់សម្គាល់ថា នៅពេលប្រព័ន្ធផ្សព្វផ្សាយថៃបានរាយការណ៍ជាសាធារណៈថា ការសាងសង់របងបេតុងរបស់ថៃនៅតំបន់ខាងលើ បានធ្វើឱ្យពលរដ្ឋថៃចំនួន ៦៦គ្រួសារ ដែលធ្លាប់ចូលមកធ្វើចម្ការលើដីខាងកម្ពុជា ទំហំ ៨៦៣រ៉ៃ ឬប្រមាណ ១៣៨ហិកតា មិនអាចបន្តធ្វើចម្ការបានទៀតនោះ ក្រុមអ្នកនយោបាយទាំងនោះបែរជាមិនលើកយកព័ត៌មាននេះមកនិយាយឡើយ។ សម្តេចធិបតីបានចោទជាសំណួរថា៖ «បងប្អូនប្រជាពលរដ្ឋខ្មែរមានចម្ងល់ដូចខ្ញុំដែរឬទេថា ក្រុមអ្នកនយោបាយខ្មែរនៅក្រៅប្រទេសមួយក្រុម តែងតែចោទរាជរដ្ឋាភិបាលដោយគ្មានភស្តុតាង ឬឯកសារ ថារាជរដ្ឋាភិបាលបានធ្វើឱ្យបាត់ដីខ្មែរនៅព្រំដែនកម្ពុជា-ថៃ នៅចន្លោះបង្គោលព្រំដែនលេខ៥២-៥៩»។ នាយករដ្ឋមន្ត្រីកម្ពុជាបានបន្តចោទសួរថា ហេតុអ្វីបានជាក្រុមអ្នកនយោបាយទាំងនោះ ហ៊ានចោទប្រកាន់រាជរដ្ឋាភិបាលថាធ្វើឱ្យបាត់បង់ទឹកដី ទោះគ្មានភស្តុតាងច្បាស់លាស់ ប៉ុន្តែនៅពេលមានព័ត៌មានដែលបង្ហាញពីស្ថានភាពផ្ទុយពីការចោទប្រកាន់របស់ខ្លួន បែរជាមិនទទួលស្គាល់ និងមិនហ៊ានលើកឡើងទៅវិញ។ ការលើកឡើងរបស់សម្តេចធិបតី ហ៊ុន ម៉ាណែត ធ្វើឡើងក្នុងបរិបទដែលបញ្ហាព្រំដែនកម្ពុជា-ថៃ នៅតែជាប្រធានបទទទួលបានការចាប់អារម្មណ៍ពីសាធារណជន ជាពិសេសការកំណត់ខណ្ឌសីមា ការបោះបង្គោលព្រំដែន និងសកម្មភាពសាងសង់របងនៅតាមតំបន់ព្រំដែន៕