洪森澄清柬泰边境立场 否认支持军事手段解决争端

អ្នកនាំពាក្យសម្តេចតេជោ ស្នើសារព័ត៌មានថៃកែតម្រូវព័ត៌មានខុសជុំវិញជំហរកម្ពុជា លោក ជា ធីរិទ្ធ អ្នកនាំពាក្យសម្តេចតេជោ ហ៊ុន សែន បានច្រានចោលការចុះផ្សាយរបស់សារព័ត៌មានថៃមួយចំនួន ដែលបានដកស្រង់ប្រសាសន៍របស់សម្តេចតេជោខុសពីខ្លឹមសារពិត ពាក់ព័ន្ធនឹងជំហររបស់កម្ពុជា ក្នុងការដោះស្រាយបញ្ហាព្រំដែនជាមួយប្រទេសថៃ។ លោក ជា ធីរិទ្ធ បានបញ្ជាក់ជូនសាធារណជនជាតិ និងអន្តរជាតិថា ក្នុងឱកាសចុះសួរសុខទុក្ខជនភៀសសឹកនៅខេត្តបន្ទាយមានជ័យ នាព្រឹកថ្ងៃទី៩ ខែមិថុនា ឆ្នាំ២០២៦ សម្តេចតេជោ ហ៊ុន សែន ប្រមុខរដ្ឋស្តីទី មិនបានប្រកាសគាំទ្រការដោះស្រាយបញ្ហាព្រំដែនជាមួយថៃដោយប្រើកម្លាំងយោធា ដូចការចុះផ្សាយរបស់សារព័ត៌មានថៃមួយចំនួននោះឡើយ។ ផ្ទុយទៅវិញ សម្តេចតេជោបានបដិសេធយ៉ាងច្បាស់ចំពោះការប្រើប្រាស់កម្លាំងយោធាក្នុងការដោះស្រាយបញ្ហានេះ។ អ្នកនាំពាក្យសម្តេចតេជោ បានពន្យល់ថា ក្នុងសុន្ទរកថានោះ សម្តេចតេជោគ្រាន់តែលើកឡើងនូវជម្រើសពីរសម្រាប់ឲ្យប្រជាពលរដ្ឋពិចារណា រួមមាន៖ ទី១ ការប្រើប្រាស់កម្លាំងយោធាដើម្បីដណ្តើមយកទឹកដីដែលថៃកំពុងកាន់កាប់ត្រឡប់មកវិញ និងទី២ ការដោះស្រាយបញ្ហាព្រំដែនដោយសន្តិវិធី តាមរយៈយន្តការច្បាប់អន្តរជាតិ។ ក្នុងចំណោមជម្រើសទាំងពីរនេះ សម្តេចតេជោបានសង្កត់ធ្ងន់ថា កម្ពុជាមិនជ្រើសរើសផ្លូវប្រើប្រាស់កម្លាំងយោធានោះទេ ប៉ុន្តែជ្រើសយកការដោះស្រាយបញ្ហាដោយសន្តិវិធី និងផ្អែកលើយន្តការច្បាប់អន្តរជាតិ។ លោក ជា ធីរិទ្ធ បានបញ្ជាក់បន្ថែមថា ប្រសាសន៍របស់សម្តេចតេជោ ហ៊ុន សែន បានបង្ហាញយ៉ាងច្បាស់នូវជំហររបស់កម្ពុជា ដែលប្រកាន់ខ្ជាប់នូវដំណោះស្រាយដោយសន្តិវិធី និងការគោរពច្បាប់អន្តរជាតិ។ ជាមួយគ្នានេះ អ្នកនាំពាក្យសម្តេចតេជោ បានអំពាវនាវឲ្យសារព័ត៌មានថៃពាក់ព័ន្ធ កែតម្រូវ និងបញ្ឈប់ការផ្សព្វផ្សាយព័ត៌មានមិនត្រឹមត្រូវ ព្រោះអាចប៉ះពាល់ដល់បរិយាកាស និងកិច្ចខិតខំប្រឹងប្រែងក្នុងការដោះស្រាយបញ្ហាព្រំដែនរវាងប្រទេសទាំងពីរ។