实居省托曼县举行公共论坛 现场解决民生诉求

ឯកឧត្តម ឈួរ សុបញ្ញា: ស្តាប់ប្រជាពលរដ្ឋ ដោះស្រាយបញ្ហាជូនប្រជាពលរដ្ឋ និងបម្រើប្រជាពលរដ្ឋដោយស្មោះត្រង់ គឺជាស្មារតីស្នូលនៃការងារចុះមូលដ្ឋានរបស់រាជរដ្ឋាភិបាល ======== ខេត្តកំពង់ស្ពឺ៖ នៅវេលាព្រឹកថ្ងៃសុក្រ ១២ កើត ខែបឋមាសាឍ ឆ្នាំមមី អដ្ឋស័ក ពស ២៥៧០ ត្រូវនឹងថ្ងៃទី២៦ ខែមិថុនា ឆ្នាំ២០២៦ ឯកឧត្តម ឈួរ សុបញ្ញា រដ្ឋលេខាធិការក្រសួងធម្មការនិងសាសនា និងជាប្រធានក្រុមការងាររាជរដ្ឋាភិបាលចុះជួយឃុំទ័ពមានបានអញ្ជើញចូលរួមដឹកនាំវេទិកាសាធារណៈរបស់ក្រុមការងាររាជរដ្ឋាភិបាលចុះមូលដ្ឋានឃុំទ័ពមាន ស្រុកថ្ពង ខេត្តកំពង់ស្ពឺ ដែលបានរៀបចំឡើងនៅវត្តកល្យាណមានជ័យ (ហៅវត្តទ័ពមាន) ដោយមានការនិមន្ត និងអញ្ជើញចូលរួមពីព្រះចៅអធិការវត្ត ក្រុមការងារចុះមូលដ្ឋាន មន្ត្រីមន្ទីរជំនាញ សមាជិកក្រុមប្រឹក្សាស្រុក លោកអភិបាលរងស្រុក ប្រធានការិយាល័យជំនាញ កងកម្លាំងប្រដាប់អាវុធទាំង៣ មន្ត្រីរាជការ និងប្រជាពលរដ្ឋជាច្រើនរូប។ វេទិកាសាធារណៈនេះ ត្រូវបានរៀបចំឡើងក្នុងគោលបំណងបង្កើនការទំនាក់ទំនង និងការប្រាស្រ័យទាក់ទងដោយផ្ទាល់រវាងអាជ្ញាធរ ក្រុមការងាររាជរដ្ឋាភិបាល និងប្រជាពលរដ្ឋ ដើម្បីស្តាប់សំណូមពរ ក្តីកង្វល់ បញ្ហាប្រឈម និងសេចក្តីត្រូវការជាក់ស្តែងរបស់ប្រជាពលរដ្ឋនៅមូលដ្ឋាន ព្រមទាំងស្វែងរកដំណោះស្រាយឱ្យបានទាន់ពេលវេលា និងមានប្រសិទ្ធភាព។ ក្នុងឱកាសនោះ ឯកឧត្តមបានពាំនាំនូវការផ្តាំផ្ញើសួរសុខទុក្ខ និងការយកចិត្តទុកដាក់ពីសំណាក់ ឯកឧត្តមឧបនាយករដ្ឋមន្ត្រី ហ៊ុន ម៉ានី ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ ជូនចំពោះប្រជាពលរដ្ឋទាំងអស់ ដោយបានគូសបញ្ជាក់ថា ថ្នាក់ដឹកនាំតែងតែចាត់ទុកសុខទុក្ខ និងជីវភាពរស់នៅរបស់ប្រជាពលរដ្ឋជាអាទិភាពខ្ពស់ និងជំរុញឱ្យក្រុមការងារគ្រប់លំដាប់ថ្នាក់ចុះជាប់ជាប្រចាំនៅមូលដ្ឋាន ដើម្បីដឹងពីបញ្ហាពិត ស្តាប់ពីតម្រូវការពិត និងដោះស្រាយបញ្ហាពិតជូនប្រជាពលរដ្ឋ។ ឯកឧត្តមបានបន្តលើកឡើងថា វេទិកាសាធារណៈ គឺជាយន្តការដ៏សំខាន់មួយរបស់រាជរដ្ឋាភិបាល ក្នុងការពង្រឹងលទ្ធិប្រជាធិបតេយ្យនៅថ្នាក់មូលដ្ឋាន និងលើកកម្ពស់ការចូលរួមរបស់ប្រជាពលរដ្ឋក្នុងការអភិវឌ្ឍសហគមន៍របស់ខ្លួន។ ការស្តាប់សំឡេងប្រជាពលរដ្ឋដោយផ្ទាល់ គឺជាមូលដ្ឋានគ្រឹះនៃការដោះស្រាយបញ្ហាប្រកបដោយប្រសិទ្ធភាព និងជាការបង្ហាញពីការយកចិត្តទុកដាក់របស់រាជរដ្ឋាភិបាលចំពោះសុខទុក្ខរបស់ប្រជាពលរដ្ឋ។ ក្នុងបរិយាកាសបើកចំហ និងស្និទ្ធស្នាល ប្រជាពលរដ្ឋបានលើកឡើងនូវសំណូមពរ និងបញ្ហាប្រឈមមួយចំនួនពាក់ព័ន្ធនឹងហេដ្ឋារចនាសម្ព័ន្ធ សេវាសាធារណៈ ការអភិវឌ្ឍមូលដ្ឋាន ការងារសង្គម និងជីវភាពរស់នៅ។ មន្ត្រីជំនាញ និងអាជ្ញាធរពាក់ព័ន្ធបានធ្វើការបកស្រាយ បំភ្លឺ និងទទួលយកសំណូមពរទាំងនោះ ដើម្បីដាក់បញ្ចូលក្នុងផែនការដោះស្រាយជាបន្តបន្ទាប់។ ជាទីបញ្ចប់ឯកឧត្តមបានអំពាវនាវឱ្យប្រជាពលរដ្ឋបន្តចូលរួមសហការជាមួយអាជ្ញាធរមូលដ្ឋាន ថែរក្សាសន្តិសុខ សណ្តាប់ធ្នាប់សង្គម គោរពច្បាប់ និងរួមគ្នាថែរក្សាសមិទ្ធផលនានាដែលសម្រេចបាន ក្រោមម្លប់សន្តិភាព ដើម្បីរួមចំណែកអភិវឌ្ឍឃុំទ័ពមាន និងខេត្តកំពង់ស្ពឺឱ្យកាន់តែរីកចម្រើន។