泰国军方发言人指责柬埔寨将柏威夏寺作为军事基地，柬方对此予以

មេ JIC ថៃ មិនទទួលស្គាល់ការពិត ចោទខ្មែរថា ប្រើប្រាសាទធ្វើជាមូលដ្ឋានយោធា ក្រោយផែនការតម្រង់គោលដៅជាង ៥០០ ចំនុចលើប្រាសាទព្រះវិហារត្រូវបើកបង្ហាញ សារព័ត៌មានថៃផ្សាយពីនាយឧត្តមសេនីយ៍ឯក ប្រាផាស សុនចៃឌី (Praphas Sonchaidee) អ្នកនាំពាក្យមជ្ឈមណ្ឌលព័ត៌មានរួម (JIC) និងជាជំនួយការមេបញ្ជាការកងទ័ពអាកាសថៃ បានចេញមុខចោទប្រកាន់កម្ពុជាថា បានប្រើប្រាស់តំបន់ប្រាសាទព្រះវិហារជាមូលដ្ឋានយោធា បន្ទាប់ពីកម្ពុជាដាក់តម្កល់ភ័ស្តុតាងពិតនៅ UNESCO ។ ការចេញមកសម្តែងការព្រួយបារម្ភ និងទាមទារឱ្យមានការស៊ើបអង្កេតឯករាជ្យពីសំណាក់ភាគីថៃនៅពេលនេះ ត្រូវបានគេមើលឃើញ និងចាត់ទុកថាជា «លេសកែខ្លួនយ៉ាងចាស់គំរឹល» ដើម្បីបង្វែរដានពីទង្វើឈ្លានពាន និងទម្លាក់កំហុសមកលើកម្ពុជានៅលើឆាកអន្តរជាតិ។ ក្នុងនោះមាន ៣ ចំណុចដែលត្រូវកត់សម្គាល់គឺ ៖ ១. ទម្លាប់ថៃប្រើលេសដើម្បីប្រកែកមិនទទួលស្គាល់ការពិត៖ នៅក្នុងសេចក្តីថ្លែងការណ៍របស់ថៃនាពេលថ្មីៗនេះ ភាគីថៃបានព្យាយាមលើកឡើងនូវអនុសញ្ញាក្រុងឡាហេ ឆ្នាំ១៩៥៤ និងពិធីសារបន្ថែមឆ្នាំ១៩៩៩ ដោយអះអាងថា ខ្លួនមានរូបថតពីលើអាកាស និងកូអរដោនេនៃអាវុធ RPG និងកាំភ្លើងប្រឆាំងយន្តហោះរបស់កម្ពុជា ព្រមទាំងប្រកាសថា «សម្បត្តិបេតិកភណ្ឌមិនគួរត្រូវបានប្រើជាខែលយោធាឡើយ»។ ប៉ុន្តែការលើកឡើងនេះគេយក់ឃើញថា នេះគ្រាន់តែជាល្បិចកលផ្លូវច្បាប់តែសំបកក្រៅប៉ុណ្ណោះ។ ថៃតែងតែប្រើប្រាស់លេសនៃការផ្ទៀងផ្ទាត់ការពិតបែបនេះ ដើម្បីបង្កើតរូបភាពថាខ្លួនជាអ្នកគោរពច្បាប់ តែធាតុពិត គឺជារបាំងបិទបាំងការមិនគោរពសាលដីកាតុលាការអន្តរជាតិ (ICJ) និងជាការបង្កើតលេសមុននឹងបើកការវាយប្រហារលើដែនអធិបតេយ្យកម្ពុជា។ ២. ថៃចោទប្រកាន់កម្ពុជា តែខ្លួនឯងជាអ្នកយកប្រាសាទ តាមាន់ធំ ធ្វើជាលេណដ្ឋានយោធា៖ ខណៈដែលភាគីថៃដេញដោលយ៉ាងស្វិតស្វាញអំពី «ការបាត់បង់កិច្ចការពារបេតិកភណ្ឌ ប្រសិនបើទីតាំងនោះក្លាយជាគោលដៅយោធា» ភាគីថៃខ្លួនឯងទៅវិញទេ ដែលជាអ្នករំលោភលើច្បាប់សង្គ្រាមយ៉ាងធ្ងន់ធ្ងរ។ ថៃបានចូលកាន់កាប់ និងបំប្លែងទីតាំង «ប្រាសាទតាមាន់ធំ» ដែលជាសម្បត្តិបេតិកភណ្ឌប្រវត្តិសាស្ត្ររបស់ជាតិខ្មែរ ឱ្យទៅជា «លេណដ្ឋាន និងមូលដ្ឋានឈរជើងយោធា» របស់ខ្លួនយ៉ាងអនាធិបតេយ្យ។ ទង្វើត្រីមុខរបស់ថៃ ដែលចោទប្រកាន់កម្ពុជាលើប្រាសាទព្រះវិហារ តែខ្លួនឯងយកប្រាសាទតាមាន់ធំធ្វើជាលេណដ្ឋានយោធា គឺជាភស្តុតាងពិតមិនអាចប្រកែកបាន។ ៣. បកស្រាយយកលាបពណ៌ ដើម្បីបិទបាំងផែនការបាញ់កម្ទេចប្រាសាទព្រះវិហារជាង ៥០០ គោលដៅ៖ អ្វីដែលគ្រោះថ្នាក់បំផុត គឺការដែលយោធាថៃបានព្យាយាមបកស្រាយបង្វែរដានមិនទទួលស្គាល់ការពិត ដោយលើកឡើងថា «ការទទួលខុសត្រូវលើការខូចខាតប្រាសាទ ត្រូវពិនិត្យលើប្រវត្តិហេតុការណ៍ថា អ្នកណាជានាក់ចាត់តាំងទ័ព និងបាញ់មុន»។ នេះគឺជាការរៀបចំយុទ្ធសាស្ត្រដោះសារ ដើម្បីដោះសារទុកជាមុនសម្រាប់ផែនការយោធាដ៏ឃោរឃៅរបស់ខ្លួន ដែលបានរៀបចំដៅគោលដៅទីតាំងជាង ៥០០ ចំនុច បើកការវាយប្រហារផ្លូវអាកាស តម្រង់ចំតំបន់ប្រាសាទព្រះវិហារ។ ការព្យាយាមបង្កើតលេសចោទថាកម្ពុជាបាញ់ចេញពីប្រាសាទ គឺគ្រាន់តែជាការបើកផ្លូវឱ្យថៃមានលេសថាជា តម្រូវការចាំបាច់ផ្នែកយោធា ដើម្បីកម្ទេចប្រាសាទបេតិកភណ្ឌពិភពលោកតែប៉ុណ្ណោះ។ ជារួម កម្ពុជានៅតែបន្តអំពាវនាវដល់សហគមន៍អន្តរជាតិ និងអង្គការ UNESCO ពិនិត្យមើលឱ្យធ្លុះពីល្បិចកលការទូត និងលេសគ្រប់សព្វដែលថៃបង្កើតឡើង ហើយកម្ពុជានឹងបន្តការពារអធិបតេយ្យភាព និងបេតិកភណ្ឌដូនតាឱ្យបានដាច់ខាត ទោះក្នុងតម្លៃណាក៏ដោយ៕